वीरगन्ज, २३ जेष्ठ : पर्साको कालीकमाई गाँउपालिका वडा नम्बर ५ बिरञ्चीबर्वामा मंगलबार दिउँसो एयरगनबाट प्रहार गरिएको गोलीको छर्रा लागेर एक बालक घाइते भएका छन् ।
घाइते हुनेमा स्थानीय ९ वर्षिय बालक श्यामसुन्दर महत्तो रहेका छन् । बिरञ्चीबर्वास्थित आँपकोे बगैंचामा मंगलबार दिउँसो महत्तोसहितका बालबालिकाहरु खेल्न गएका थिए । त्यहि बेला बगैंचाधनी ४५ वर्षिय बलिराम तिवारीले आँप टिप्न आएको भन्दै एयरगनबाट गोली हानेको र उक्त गोलीको छर्रा लागेर महत्तो घाइते भएको पर्साका प्रहरी उपरीक्षक कोमल शाहले बताए ।
घुडाँमा गोलीको छर्रा लागेर घाइते भएका महत्तोलाई उपचारका लागि वीरगन्ज ल्याइएको जानकारी शाहले दिए । गोली चलाउने तिवारी भने फरार रहेकाले प्रहरीले उनको खोजी गरिरहेको शाहले बताए । शाहले भने,‘ तिवारीले आफनो घरको पछाडि रहेका आँपको बगैंचामा खेल्न आएका बालबालिकाहरुलाई धपाउन एयरगनबाट गोली हानेका रहेछन् , त्यहि गोलीको छर्रा लागेर एक जना बालक सामान्य घाइते भएको खबर छ ।
घटनाको जानकारी पाएलगत्तै प्रहरी निरिक्षकको नेतृत्वमा प्रहरी टोली घटनास्थलमा पठाइएको र उक्त टोलीले घटना बारे अनुसन्धान गरिरहेको प्रहरी उपरीक्षक शाहले बताए ।