वीरगन्ज,२२चैत:वीरगन्ज महानगरपालिकाले सन् २०३५ सम्म महानगरलाई क्षयरोग मुक्त घोषणा गर्ने लक्ष्य लिएको छ ।
आगामी ५ वर्षभित्र क्षय रोगीको संख्या अन्त्य गर्ने र १० वर्षभित्र मुक्तको घोषणा नै गर्ने गरि महानगले आजबाट अभियान नै सुरु गरेको हो ।
महानगरभित्र क्षयरोगको पहिचान, निदान र उपचार सेवामा सुधार गर्न घरघरमा पुगेर निशुल्क खकार जाँच स्क्रिनिङ संचालन गर्ने र त्यसका लागि स्वास्थ्यकर्मी परिचालन गर्ने तयारी थालेको छ।
क्षयरोगमुक्त वीरगंज बनाउने र क्षयरोगको निदान उपचारमा लाग्ने आर्थिक व्ययभारलाई शून्यमा झार्ने लक्ष्यका साथ अभियान अगाडी बढाइएको महानगरपालिकाका प्रमुख प्रशासकीय अधिकृत अरविन्द लाल कर्णले बताए ।
अभियान स्वरुप महानगरले शुक्रबार क्षयरोग मुक्त पालिकाको स्थापनाका लागि समिति गठन गर्ने काम सकेको छ । पालिका स्तरमा महानगर प्रमुखको संयोजकत्वमा समिति रहने र वडामा सम्बन्धित वडाको अध्यक्ष संयोजक रहने गरी समिति गठनको प्रारम्भिक सुरुवात गरिएको प्रमुख प्रशासकीय अधिकृत कर्णले जानकारी दिए।क्षयरोग उन्मुलनका लागि सुक्ष्म रुपमा गाउँ, टोल र घरसम्मै पुगेर रोग पहिचान गर्दै त्यसलाई उपचारको दायरामा ल्याउनु चुनौति भएपनि सबैको साथ र सहयोगबाट लक्ष्य पूरा हुने विश्वास पनि लिए ।
कार्यक्रममा वडा नंवर २६ का वडा अध्यक्ष शम्भु मिश्रले समाजमा क्षयरोगीलाई हेलाका दृष्टिले हेर्ने गरिएकाले रोग लुकाएर राख्दा फैलन पुगेको भन्दै उहाँले रोग पहिचान गरी उपचारसम्ममा ल्याउन अब सबैको सक्रियता रहनु पर्नेमा जोड दिए।कार्यक्रममा ३२ वटै वडाका वडाअध्यक्ष, स्वास्थ्यकर्मी तथा सरोकारवालाहरुको सहभागिता रहेको थियो । वडा अध्यक्षहरुले अब वडा तहमा यसको पहिचान र निदानका लागि समिति गठन गरेर घरघरमै पुग्ने संयन्त्र खडा गर्नेछन्।
सरकारले सन् २०३५ सम्म क्षयरोगको महामारी समाप्त गर्ने लक्ष्य राखेको छ ।क्षयरोगका बिरामीमध्ये ७२ प्रतिशत फोक्सोका र २८ प्रतिशत अन्य अंगका बिरामी हुन्छन्। अन्य अंगमा फोक्सोको पानी, हड्डी र मस्तिष्कमा पनि क्षयरोग फैलन सक्दछ ।क्षयरोगको प्रमुख लक्षणहरूमा २ हप्ताभन्दा बढी समय खोकी लाग्नु, राति ज्वरो आउनु, तौल घट्नु र खानामा रुचि कम हुनु समावेश छन् ।
धुमपान, सुर्तीजन्य पदार्थको सेवन, मधुमेह, मादकपदार्थको सेवन, एचआइभी सङ्क्रमण र कमजोर रोग प्रतिरोधात्मक क्षमतासहितका व्यक्तिहरूलाई क्षयरोगको उच्च जोखिम हुन्छ ।
महानगरले छिटो र प्रभावकारी रुपमा रोग पहिचान गर्न ३२ वटै वडाका स्वास्थ्य केन्द्र, महिला स्वास्थ्य स्वयंसेविका र स्वास्थ्यकर्मीहरूको परिचालन गर्ने तयारी गरेको छ। साथै, रोगी पत्ता लगाउन मेसिन जडान गरेर काम सुरु गरिएको छ क्षयरोगको उपचारका लागि आवश्यक औषधि निःशुल्क उपलब्ध गराइनेछ ।